பயிற்சி மையங்களுக்கான 30% பூமிபுத்ரா பங்குரிமை (equity) நிபந்தனை நீக்கப்பட்டுள்ளதாகக் கூறி, கல்வி அமைச்சகம் அது குறித்த எழுத்துப்பூர்வ உறுதிப்படுத்தலை வெளியிட வேண்டும் என்று முன்னாள் கல்வித் துணை அமைச்சர் பி. கமலாநாதன் வலியுறுத்தி உ ள்ளார்.
இந்த நிபந்தனையை நீக்கும் அமைச்சகத்தின் முடிவை வரவேற்ற கமலாநாதன், இந்த மாற்றம் புதிய விண்ணப்பங்களுக்கும், உரிமத்தைப் புதுப்பிக்க விரும்பும் ஏற்கனவே உள்ள மையங்களுக்கும் பொருந்துமா என்பதை அமைச்சகம் தெளிவுபடுத்த வேண்டும் என்று கூறினார்.
மேலும், குழப்பத்தைத் தவிர்க்க அமைச்சு தனது இணையதளத்தில் தொடர்புடைய அனைத்து வழிகாட்டுதல்களையும் புதுப்பிக்க வேண்டும் என்றும் அவர் கேட்டுக்கொண்டார்.
“தனது கட்டுப்பாட்டில் உள்ள தனியார் கல்வி நிறுவனங்களுக்கான 30% பூமிபுத்ரா பங்குரிமை நிபந்தனையை நீக்கும் அமைச்சின் முடிவு… மலேசியக் கல்வித் துறைக்குச் சரியான ஒன்றாகும்,” என்று அவர் ஒரு அறிக்கையில் தெரிவித்தார்.
பங்குதாரர்களின் இனக் கலவைக்கு பதிலாக, ஆசிரியர்களின் தரம், மாணவர் பாதுகாப்பு மற்றும் கற்றல் விளைவுகள் ஆகியவற்றின் அடிப்படையில் பயிற்சி மையங்கள் மதிப்பிடப்பட வேண்டும் என்றும் கமலாநாதன் கூறினார்.
பயிற்சி மைய நடத்துநர்கள், பெற்றோர் கள் மற்றும் பிற பங்குதாரர்களின் கருத்துகளுக்குச் செவிசாய்த்ததற்கும், நாட்டின் கல்வி மேம்பாட்டிற்குப் பங்களிக்க விரும்புவோருக்குக் கல்வித் துறையைத் திறந்து வைத்ததற்கும் கல்வி அமைச்சகம் மற்றும் முதலீடு, வர்த்தகம் மற்றும் தொழில் அமைச்சகம் ஆகியவற்றுக்கு முன்னாள் உலு சிலாங்கூர் நாடாளுமன்ற உறுப்பினர் நன்றி தெரிவித்தார்.
