டெங்க்கில் தேசியப் பள்ளியில் (SK Dengkil) வகுப்பறையில் இருந்தபோது மூச்சுத் திணறலுக்கு ஆளான ஏழு வயது சிறுமி ஒருவர் உயிரிழந்தது உறுதி செய்யப்பட்டுள்ளது.
செப்பாங் மாவட்டக் காவல் துறைத் தலைவர், உதவி ஆணையர் நோர்ஹிசாம் பகமான் கூறுகையில், அக்டோபர் 19 அன்று மாலை 7:30 மணியளவில், அந்த மாணவியின் மரணம் குறித்து ஒரு பெண் அளித்த புகாரைப் பெற்றதாகத் தெரிவித்தார்.
உள்ளூர் குடிமகளான அந்தச் சிறுமிக்கு, சம்பவ இடத்திலேயே முதற்கட்ட சுவாச உதவி வழங்கப்பட்டதாகவும், பின்னர் மேல் சிகிச்சைக்காக புத்ராஜெயா மருத்துவமனைக்குக் கொண்டு செல்லப்பட்டதாகவும் அவர் குறிப்பிட்டார்.
இருப்பினும், மருத்துவமனைக்குச் சென்றடைந்தபோது அவர் ஏற்கனவே உயிரிழந்துவிட்டதாக மருத்துவர்கள் அறிவித்தனர்.
“செப்பாங் மாவட்டக் காவல் தலைமையகத்தின் (IPD) குற்றப் புலனாய்வுத் துறை, இந்தச் சம்பவம் குறித்து மேலதிக விசாரணைகளை மேற்கொண்டு வருகிறது.
“விசாரணைக்கு உதவும் வகையில், இன்று காலை 8:00 மணிக்கு புத்ராஜெயா மருத்துவமனையில் உடற்கூறாய்வு பரிசோதனை செய்யப்பட்டது. இந்த வழக்கு ‘திடீர் மரணம்’ (Sudden Death Report – SDR) என வகைப்படுத்தப் பட்டுள்ளது,” என்று அவர் இன்று வெளியிட்ட அறிக்கையில் தெரிவித்துள்ளார்.
இதற்கிடையில், இந்தச் சம்பவம் குறித்து தவறான தகவல்களைப் பரப்ப வேண்டாம் என்று பொதுமக்களுக்கு நோர்ஹிசாம் அறிவுறுத்தினார்.
இந்தச் சம்பவம் குறித்த ஏதேனும் தகவல் தெரிந்தவர்கள், புலனாய்வு அதிகாரி ஆய்வாளர் விஷ்ணு குமார் ஏ/எல் தருமா ரத்தினம் (Inspector Vishno Kumar a/l Tharuma Rethinam) அவர்களை 011-11021528 என்ற எண்ணில் தொடர்பு கொள்ளுமாறு கேட்டுக்கொள்ளப் படுகிறார்கள்.
