92 ஆண்டு கால வரலாற்றைக் கொண்ட, மலேசியாவின் பிரபலமான பிஸ்கட் பிராண்டான லீ பிஸ்கட்ஸ் மலேசியா எஸ்.டி.என். பி.எச்.டி, இந்த மாத இறுதிக்குள் தனது செயல்பாடுகளை நிறுத்தவுள்ளது.
சைனா பிரஸ்ஸின் தகவல்படி, ஜோஹோரின் பொன்டியானில் உள்ள தனது தொழிற்சாலையில் அந்நிறுவனம் உற்பத்தியை நிறுத்தவுள்ளது; எதிர்கால உற்பத்தி குறித்த எந்தத் திட்டங்களும் அறிவிக்கப்படவில்லை.
கடந்த மாதம் முதலே, இந்த உற்பத்தி நிறுத்தம் குறித்த அறிவிப்புகளை விநியோகஸ்தர்களும் வாடிக்கை யாளர்களும் பெற்று வருவதாகக் கூறப்படுகிறது.
மேலும், அத்தொழிற்சாலை தனது ஊழியர்களைப் பணிநீக்கம் செய்யும் பணியில் ஈடுபட்டுள்ளதாகவும், நிறுவனத்தின் அதிகாரப்பூர்வ இணையதளம் தற்போது அணுக முடியாத நிலையில் உள்ளதாகவும் கூறப்படுகிறது.
சைனா பிரஸ் தொடர்பு கொண்டபோது, பெக்கான் நானாஸ் சட்டமன்ற உறுப்பினர் டான் எங் மெங், தொழிற்சாலை மூடப்படவிருப்பது குறித்த செய்தி தனக்குக் கிடைத்ததை உறுதிப்படுத்தினார்.
நிறுவனம் தனது வணிகத்தை மறுசீரமைக்கும் முடிவுடன் இந்தத் தொழிற்சாலை மூடல் தொடர்புடையது என்று அறியப்படுகிறது.
