ஓய்வுபெற்றவர்கள் வழிகாட்டிகளாகத் தொடர்ந்து பங்களிப்பை வழங்க வழிவகை செய்யப்படும் என்று மனிதவள அமைச்சர் டத்தோ ஸ்ரீ ஆர். ரமணன் தெரிவித்தார்.
ஓய்வுபெற்றவர்கள் எவ்வாறு வழிகாட்டு தல்களை வழங்கலாம் என்பது குறித்து, அமைச்சகத்தின் தலைமைச் செயலாளர் மற்றும் அதன் கீழ் இயங்கும் முகமைகள் மற்றும் துறைகளின் தலைவர்களுடன் கலந்துரையாடப்போவதாக அவர் கூறினார்.
“நாங்கள் இதற்கான வழியைக் கண்டறிவோம். கவலைப்பட வேண்டாம், இதற்காக நான் அரசாங்கத்திடம் நிதி கோரப்போவதில்லை. உதவி செய்வதற்கான வழியை நானே கண்டறிந்துகொள்வேன்,” என்று புதன்கிழமை (அக்டோபர் 21) நடைபெற்ற அமைச்சின் ஓய்வுபெற்றோர் பாராட்டு விழாவில் அவர் பேசினார்.
நிகழ்ச்சிக்குப் பிறகு செய்தியாளர் களிடம் பேசிய ரமணன், அமைச்சு மற்றும் அதன் 10 துறைகளைச் சேர்ந்த 170 அதிகாரிகள் மற்றும் பணியாளர்கள் இந்த ஆண்டு ஓய்வுபெற்றுள்ளனர் அல்லது ஓய்வுபெற உள்ளனர் என்று தெரிவித்தார்.இவர்களில் அறுபதுக்கும் மேற்பட்டோர் இந்த பாராட்டு விழாவில் கலந்துகொண்டனர்.
சிலர் மூன்று தசாப்தங்களாகச் சேவை செய்துள்ளனர் என்று ரமணன் குறிப்பிட்டார்.”மனிதவள அமைச்சின் (Kesuma) கதவுகள் எப்போதும் திறந்தே இருக்கும். அவர்கள் எப்போது வேண்டுமானாலும் வரலாம். அவர்கள் இன்னும் இந்த மிகப்பெரிய ‘கெசுமா’ (Kesuma) குடும்பத்தின் ஒரு அங்கமே,” என்று அவர் கூறினார்.
தமது உரையில், ஓய்வு என்பது ஒரு முடிவு அல்ல, அது ஒரு புதிய தொடக்கம் என்று கூறிய ரமணன், ஓய்வுபெற்றவர்கள் தங்கள் அறிவு மற்றும் திறன்களை இளைய தலைமுறையினருக்குக் கடத்த முடியும் என்று தெரிவித்தார்.
