கைவிடப்பட்ட வாகனங்கள் குவிந்து கிடக்கும் பிரச்சினையைத் தீர்க்க, கடந்த செப்டம்பரில் பினாங்கு தீவு நகர மன்றத்தால் (MBPP) தொடங்கப்பட்ட முன்னோடித் திட்டத்தின் வெற்றியைத் தொடர்ந்து, பினாங்கு மாநில அரசு தனது ‘ஸ்ட்ராட்டா’ (strata) அடுக்குமாடி குடியிருப்புப் பகுதிகளுக்கான பயன்பாடு இழந்த வாகனங்களை (ELV) அகற்றும் திட்டத்தை மாநிலம் முழுவதும் விரிவுபடுத்தவுள்ளது.
உள்ளாட்சி, நகர்ப்புற மற்றும் கிராமப்புறத் திட்டமிடல் குழுவின் தலைவர் ஹ்ங் மூய் லியே (H’ng Mooi Lye), செபெராங் பெராய் நகர மன்றமும் இதே போன்றதொரு முயற்சியை அமல்படுத்துவது குறித்து ஆய்வு செய்து வருவதாகத் தெரிவித்தார்.
சுற்றுச்சூழல் துறையின் உரிமம் பெற்ற அங்கீகரிக்கப்பட்ட வாகனச் செயலாக்க மையத்தை (authorised automotive treatment facility) வெளிப்படையான ஏல நடைமுறை மூலம் மாநில அரசு நியமிக்கும் என்றும், இந்த நடைமுறை அக்டோபர் மாதத்திற்குள் இறுதி செய்யப்படும் என்றும் ஹ்ங் கூறினார்.
“நியமனம் இறுதி செய்யப்பட்டதும், மாதம் 20 முதல் 30 வரையிலான பயன்பாடு இழந்த வாகனங்களைச் சேகரிக்க மாநில அரசு திட்டமிட்டுள்ளது. குறிப்பாக வாகனங்கள் குவிந்து கிடக்கும் சிக்கலை எதிர்கொள்ளும் அடுக்குமாடி குடியிருப்புப் பகுதிகள் மற்றும் பொது இடங்களில் புகார்களின் அடிப்படையில் உள்ளாட்சி அமைப்புகளால் அகற்றப்படும் வாகனங்கள் இதில் அடங்கும்,” என்று அவர் கூறியதாக ‘பெர்னாமா’ செய்தி நிறுவனம் இன்று தெரிவித்தது.
இத்திட்டம் அறிமுகப்படுத்தப்பட்ட திலிருந்து, 28 கார்கள், ஒரு மோட்டார் சைக்கிள் மற்றும் ஒரு வேன் என மொத்தம் 30 வாகனங்கள் அகற்றுவதற்காகத் தாமாக முன்வந்து ஒப்படைக்கப்பட்டுள்ளன என்று அவர் கூறினார்.
வாகன உரிமையாளர்களுக்கு வழங்கப்பட்ட மொத்த இழப்பீட்டுத் தொகையை மாநில அரசு பதிவு செய்யவில்லை; ஏனெனில், வாகனத்தின் வகை மற்றும் நிலையைப் பொறுத்து நிர்ணயிக்கப்பட்ட தொகையானது, அங்கீகரிக்கப்பட்ட வாகனச் செயலாக்க மையத்தால் நேரடியாக வழங்கப்பட்டது.
