தங்கள் நற்பெயரைக் காப்பதற்காக கொடுமைப்படுத்துதல் சம்பவங்களை பள்ளிகள் மறைக்கக் கூடாது என்று பிரதமர் அன்வார் இப்ராஹிம் இன்று நினைவூட்டினார். பாதிக்கப்பட்டவர் களைப் பாதுகாப்பதற்கும், இப்பிரச்சனையைத் திறம்படக் கையாள்வதற்கும் விரைவான நடவடிக்கை அவசியம் என்றும் அவர் வலியுறுத்தினார். “சிலர் கொடுமைப்படுத்துதலை ஒரு சிறிய பிரச்சினையாகக் கருதலாம், ஆனால் பாதிக்கப்பட்டவர்கள் மீதான அதன் தாக்கம் ஆழமானது. தங்கள் நற்பெயரைக் காப்பதற்காக மட்டுமே பள்ளிகள் வழக்குகளை மூடிமறைக்க முயற்சிப்பதை நான் ஏற்கவில்லை.
“1,000 மாணவர்கள் உள்ள ஒரு பள்ளியில் இரண்டு கொடுமைப்படுத்துதல் வழக்குகள் பதிவானால், தலைமை ஆசிரியரையோ அல்லது முதல்வரையோ குறை சொல்லக்கூடாது.” “சம்பவத்தைப் புகாரளித்ததற்காக அவர்கள் மீது எந்தத் தவறும் இல்லை, ஆனால் அவர்கள் எந்த நடவடிக்கையும் எடுக்காமல் இந்த வழக்கை மூடிமறைத்தால் அது தவறு,” என்று பண்டார் என்ஸ்டெக்கில் கல்வி அமைச்சர் ஃபட்லினா சிடெக் கலந்துகொண்ட ஒரு நிகழ்வில் அவர் கூறினார்.
கடந்த காலத்தை விட மதக் கல்விக்கான அணுகல் பரவலாக இருந்தபோதிலும், மாணவர்களிடையே நல்ல குணத்தையும் தார்மீக விழுமியங்களையும் வளர்ப்ப தற்கான முயற்சிகளில் உள்ள குறைபாடுகளையே கொடுமைப் படுத்துதல் தொடர்வது பிரதிபலிக்கிறது என்று அன்வார் கூறினார். கல்வியானது, கல்வியில் சிறந்து விளங்கும் பட்டதாரிகளையோ அல்லது தொழில்நுட்பத் திறன்கொண்ட நிபுணர்களையோ உருவாக்குவதில் மட்டும் கவனம் செலுத்தாமல், மனித விழுமியங்களைப் புரிந்துகொண்டு மற்றவர்களை மதிக்கும் தனிநபர்களையும் வளர்க்க வேண்டும் என்று அவர் கூறினார்.
“நாம் தொழில்நுட்ப வல்லுநர்களாகவோ, தகவல் தொழில்நுட்ப நிபுணர்களாகவோ ஆகலாம் அல்லது முனைவர் பட்டம் பெற்றிருக்கலாம், ஆனால் மனிதநேயத்தைப் புரிந்துகொள்ளவும் மற்றவர்களை மதிக்கவும் நமக்குக் கற்பிக்கப்படாவிட்டால், இந்தச் சாதனைகளின் மதிப்பு என்ன?” என்று அவர் கூறினார். வலுவான நம்பிக்கை, சிறந்த தார்மீக விழுமியங்கள் மற்றும் பிறர் மீது இரக்கம் கொண்ட தலைமுறைகளை உருவாக்கும் கற்றல் இடங்களாகக் கல்வி நிறுவனங்கள் தொடர்ந்து இருப்பதை உறுதிசெய்யும் முக்கியப் பொறுப்பு ஆசிரியர்களுக்கு உள்ளது என்றும் பிரதமர் அன்வார் கூறினார்.
