அதிகாலை நடைபெற்ற 2026 ஃபிஃபா (FIFA) உலகக் கோப்பை இறுதிப் போட்டியின் நேரடி ஒளிபரப்பிற்குப் பிறகு, ‘டத்தாரான் மெர்டேகா’ (Dataran Merdeka) பகுதியில் குவிந்திருந்த குப்பைகளைச் சுத்தம் செய்ய அயராது உழைத்த கோலாலம்பூர் மாநகராட்சி (DBKL) ஊழியர்களுக்கு, பிரதமர் துறையின் (கூட்டரசுபிரதேச அமைச்சர் ஹன்னா யோ (Hannah Yeoh) தனது பாராட்டுகளைத் தெரிவித்துள்ளார்.
பொது இடங்களைச் சுத்தமாக வைத்திருப்பதில் பொதுமக்கள் தங்கள் பங்கை ஆற்ற வேண்டும் என்று வலியுறுத்திய ஹன்னா, குப்பைகளைத் தொட்டிகளில் போடுவது ஒரு அடிப்படை குடிமைப் பொறுப்பு என்றும், அதை முழுமையாகப் பொதுப் பணி ஊழியர்களிடம் மட்டும் விட்டுவிடக் கூடாது என்றும் கூறினார்.
“ஆம், வரி செலுத்தும் ஒவ்வொருவரும் சிறந்த பொதுச் சேவைகளைப் பெறத் தகுதியானவர்கள் என்பது எனக்குத் தெரியும். நகராண்மைக் கழகம் தனது பொறுப்புகளை நிறைவேற்ற வேண்டும், அது அவ்வாறே செய்துள்ளது. ஆனால், குப்பைகளைத் தொட்டிகளில் போடுவது என்பது நாமே செய்ய வேண்டிய ஒரு செயலாகும்.
“பொதுச் சேவைகளைப் பெறுவதற்கான உரிமை என்பது, அனைத்துப் பொறுப்புகளையும் பொதுப் பணி ஊழியர்களிடம் சுமத்திவிடலாம் என்று அர்த்தமல்ல. நாம் வேண்டுமென்றே விட்டுச் செல்லும் குப்பைகளை அவர்கள் சுத்தம் செய்ய வேண்டிய நிலை இருக்கக்கூடாது,” என்று அவர் திங்கள்கிழமை (ஜூலை 20) தனது ஃபேஸ்புக் பதிவில் குறிப்பிட்டார்.
‘டத்தாரான் மெர்டேகா’ என்பது நாட்டின் வரலாற்றின் ஒரு பகுதியாகவும், தலைநகரின் கண்ணியத்தின் அடையாளமாகவும் திகழ்கிறது என்றும், அதைப் பாதுகாப்பதில் அனைவருக்கும் பங்கு உண்டு என்றும் ஹன்னா கூறினார்
