இந்தோனேசியாவின் மேற்கு கலிமந்தான் மாகாணத்தில் உள்ள பொந்தியனாக் (Pontianak) பகுதியில், இணையவழி மோசடி நடவடிக்கைகளில் ஈடுபட்டதாக சந்தேகிக்கப்படும் 30 மலேசியர்கள் தடுத்து வைக்கப்பட்டுள்ளதைத் தொடர்ந்து, மலேசியா இது குறித்து விசாரணை நடத்தவுள்ளது.
இவ்விவகாரம் தொடர்பாக நாட்டின் அதிகாரிகள் உரிய நடவடிக்கைகளை மேற்கொள்வார்கள் என்று உள்துறை அமைச்சர் டத்தோ ஸ்ரீ சைஃபுதீன் நசுத்தியோன் இஸ்மாயில் தெரிவித்தார்.
“எங்கள் தரப்பிலிருந்து விசாரணை நடத்துவதற்கு ஏதுவாக, இந்தோனேசிய அதிகாரிகள் எங்கள் காவல் துறையைத் தொடர்புகொள்வது வழக்கமான நடைமுறையாகும்.
“இந்த 30 பேரும் தனிப்பட்ட முறையில் செயல்பட்டார்களா அல்லது நன்கு திட்டமிடப்பட்ட ஒரு மோசடிக் கும்பலின் (syndicate) ஒரு பகுதியாகச் செயல்பட்டார்களா என்பதை உறுதி செய்வதே இதன் நோக்கமாகும். இதன் மூலம் பெறப்படும் தகவல்கள், அடுத்தகட்ட நடவடிக்கைகளுக்கான திட்டத்தை வகுக்க எங்களுக்கு உதவும்,” என்று அவர் கூறினார்.
சனிக்கிழமையன்று பெக்கானில் உள்ள ‘செகோலா கெபாங்சான் நெனாசி’ ( பள்ளியில், குடிநுழைவுத் துறையின் ‘2026 மடானி தத்தெடுக்கப்பட்ட கிராமம் மற்றும் பள்ளி’ திட்டத்தைத் தொடங்கி வைத்த பிறகு நடைபெற்ற செய்தியாளர் சந்திப்பில் அவர் இவ்வாறு கூறினார்.
வெளிநாட்டினர் சம்பந்தப்பட்ட சந்தேகத்திற்கிடமான நடவடிக்கைகள் குறித்த உளவுத் தகவலின் அடிப்படையில், செவ்வாய்க்கிழமை காலை சுமார் 11.15 மணியளவில் இந்தோனேசிய அதிகாரிகள் ஒரு ஹோட்டலில் 30 மலேசியர்களையும் ஒரு தைவான் நாட்டவரையும் தடுத்து வைத்ததாகத் தெரிவிக்கப்பட்டுள்ளது
