கடந்த புதன்கிழமை, மூன்று காவல் துறை அதிகாரிகளுக்கு வேண்டு மென்றே காயம் ஏற்படுத்தியதாகக் கூறப்படும் குற்றச்சாட்டில், எட்டு பேர் மாஜிஸ்திரேட் நீதிமன்றத்தில் தாங்கள் குற்றமற்றவர்கள் என வாதிட்டனர். நூர் நிசார் ஷா ஜைனோல் அபிதின், 37; முஹம்மது ஷாஃபிக் முகமது நோர்டின், 28; அஸ்வண்டி அஸ்மி, 38; முகம்மது அய்கால் சுல்கிஃப்ரே, 28; முஹம்மது ஃபிர்தாஸ் அப்துல் மாலிக், 34; முகம்மது ரசின் அப்துல் முத்தலிப், 34; முகம்மது ஷாஸ்வான் முகமது உமர், 30 மற்றும் லோ ஜியா ஹுய், 26, ஆகியோர் மாஜிஸ்திரேட் துங்கு இன்டான் நதியா துங்கு முகமது நசாரின் முன்னிலையில் இந்த வாதத்தை முன்வைத்தனர்.
குற்றச்சாட்டின்படி, 26 வயதான எஸ். உவனேந்த், 23 வயதான முகம்மது டேனியல் டேனிஷ் அஸ்லான் மற்றும் 30 வயதான முகம்மது அம்ஸருதீன் ஃபக்ரி குய்ருதீன் ஆகியோர் சட்டப்பூர்வமான அரசு ஊழியர்களாகத் தங்கள் கடமை களை ஆற்றிக்கொண்டிருந்தபோது, அவர்களுக்கு வேண்டுமென்றே காயம் ஏற்படுத்தியதாக அவர்கள் மீது கூட்டாகக் குற்றம் சாட்டப்பட்டுள்ளது.
குற்றம் சாட்டப்பட்டவர்கள், மார்ச் 25 அன்று இரவு 9.50 மணிக்கு, சுங்கை பினாங்கில் உள்ள ஜாலான் சுங்கையில் அமைந்துள்ள மக்கள் வீட்டுவசதித் திட்ட (PPR) குடியிருப்புகளுக்கு முன்பாக இந்தக் குற்றத்தைச் செய்ததாகக் கூறப்படுகிறது. குற்றவாளி என நிரூபிக்கப்பட்டால், அதிகபட்சமாக மூன்று ஆண்டுகள் சிறைத்தண்டனை அல்லது அபராதம் அல்லது இரண்டும் விதிக்கப்படலாம்.
விசாரணையின் போது, துணை அரசு வழக்கறிஞர் சித்தி மர்லிசா சஃபினாசைஃபுல் அட்லி, குற்றம் சாட்டப்பட்ட ஒவ்வொருவருக்கும் RM10,000 பிணைத்தொகை வழங்கப் பரிந்துரைத்தார். இருப்பினும், குற்றம் சாட்டப்பட்ட அனைவருக்காகவும் வாதாடிய வழக்கறிஞர் எஸ். மேகராஜ், தனது கட்சிக்காரர்கள் சமையல்காரர்கள், எழுத்தர்கள், மெக்கானிக்குகள் மற்றும் உணவு விநியோகிப்பவர்கள் போன்ற குறைந்த வருமானம் கொண்ட சாதாரண தொழிலாளர்கள் என்ற அடிப்படையில் குறைந்தபட்ச பிணைத்தொகையைக் கோரினார் பின்னர் நீதிமன்றம், குற்றம் சாட்டப்பட்ட ஒவ்வொருவருக்கும் ஒரு ஜாமீனுடன் RM5,000 பிணை வழங்க அனுமதித்த துடன், ஆவணங்களைச் சமர்ப்பிப் பதற்காக மே 19-ஆம் தேதியை நிர்ணயித்தது.
