ஞாயிற்றுக்கிழமை தம்போய் பகுதியில் உள்ள 24 மாடி அடுக்குமாடிக் குடி யிருப்பில் இருந்து கீழே விழுந்து உயிர் தப்பிய 10 வயது சிறுவனுக்கு இன்று அறுவை சிகிச்சை செய்யப் பட்டது.
அவன் சுல்தானா அமினா மருத்துவ மனையின் தீவிர சிகிச்சைப் பிரிவில் கவலைக்கிடமான நிலையில் உள்ளான். சகோதர சகோதரிகள் அந்த அடுக்குமாடிக் குடியிருப்பின் 12வது மாடியில் இருந்து கீழே விழுந்து, குடியிருப்பின் நீச்சல் குளப் பகுதிக்கு அருகில் கண்டெடுக்கப்பட்டனர்.
புத்ரி என்று மட்டும் அடையாளம் காணப்பட்ட அந்தச் சிறுமி, சம்பவ இடத்திலேயே உயிரிழந்ததாக அறிவிக்கப்பட்டார். அதே சமயம், அவரது சகோதரன் இர்பான் பலத்த காயங்களுடன் தப்பினான்.
இந்தோனேசியரான அவர்களின் 37 வயது தாய், அதே நாளில் கைது செய்யப்பட்டார். குழந்தைகள் சட்டம் 2001-இன் கீழ், குழந்தையைப் புறக்கணித்தல், துன்புறுத்துதல், கைவிடுதல் அல்லது பாதுகாப்பற்ற நிலையில் வைத்தல் ஆகிய குற்றச்சாட்டுகள் குறித்த விசாரணைகளுக்கு வசதியாக, காவல்துறை அவருக்கு எதிராக நான்கு நாள் நீதிமன்றக் காவல் உத்தரவைப் பெற்றது.
“அவள் தன் சகோதரனுடன் மிகவும் நெருக்கமாக இருந்தாள். துயரச் சம்பவத்திற்கு முன்பு அவளிடம் எந்த நடத்தை மாற்றங்களும் இல்லை என்றும், வழக்கம் போல் மகிழ்ச்சியாகவே காணப்பட்டாள் என்றும் எங்களுக்குத் தெரிவிக்கப்பட்டது,” என்று அந்த நிர்வாகி கூறினார்.
பெயர் குறிப்பிட விரும்பாத அந்த நிர்வாகி, புத்ரி நேற்று இம்பியான் ஏமாஸ் முஸ்லிம் மயானத்தில் நல்லடக்கம் செய்யப்பட்டதாகக் கூறினார். சம்பவம் நடந்த அன்று உடன்பிறப்புகள் தரையில் கிடந்த வைரல் வீடியோக்கள் இன்று பரவின.
துயரத்தில் இருக்கும் குடும்பத்தினரின் உணர்வுபூர்வமான அணுகுமுறை மற்றும் மரியாதையைக் கருத்தில் கொண்டு, வைரல் வீடியோக்களை நீக்குமாறும், சமூக ஊடகத் தளங்களில் பரப்புவதை நிறுத்துமாறும் காவல்துறை பொதுமக்களை வலியுறுத்தியிருந்தது
