டிஎபி தனது தலைவர்களை அரசாங்கப் பதவிகளிலிருந்து விலக்கிக்கொண்டால் நாடாளுமன்றத்தைக் கலைக்க வேண்டும் என்ற கோரிக்கையை பிகேஆர் நிராகரித்துள்ளது; ஒற்றுமை அரசாங்கம் தனது பதவிக்காலம் முடியும் வரை தொடரப் போதுமான ஆதரவைக் கொண்டுள்ளது என்று அது கூறி உள்ளது.
பாஸ்இன் உதவிப் பொதுச் செயலாளர் கைருல் ஃபைசி அகமது காமில் முன் வைத்த இந்த யோசனை முழுமையாகச் சிந்திக்கப்படாமல் முன்வைக்கப்பட்டது என்று பிகேஆர்-இன் துணைப் பொதுச் செயலாளர் சைஃபுதீன் ஷாஃபி முகமது கூறினார்.
“ஒற்றுமை அரசாங்கம் மக்களின் ஆணையின் அடிப்படையில் அமைக்கப் பட்டது; எனவே, குறிப்பாக நாட்டின் பொருளாதாரத்தை முன்னெடுத்துச் செல்வதில் அது நிரூபித்துள்ள சிறப்பான செயல்பாட்டைக் கருத்தில் கொண்டு, அது தனது முழு பதவிக்காலம் வரை தொடர அனுமதிக்கப்பட வேண்டும்.
டிஎபி-இன் அடிமட்டத் தொண்டர்கள் தங்கள் தலைவர்கள் அரசாங்கப் பதவிகளிலிருந்து விலக வேண்டும் என்று முடிவு செய்தாலும், கட்சியின் நாடாளுமன்ற உறுப்பினர்கள் தொடர்ந்து அரசாங்கக் கூட்டணியின் ஒரு பகுதியாகவே நீடிப்பதால், நிலைமை சீராகவே இருக்கும்,” என்று அவர் இன்று வெளியிட்ட அறிக்கையில் தெரிவித்தார்.
டிஎபிஇன் தலைவர்கள் அரசாங்கப் பதவிகளிலிருந்து விலக வேண்டுமா என்பது குறித்து ஆகஸ்ட் 16 அன்று நடைபெறவுள்ள கட்சியின் மாநாட்டில் முடிவு செய்யப்படும் என்று DAP-இன் பொதுச் செயலாளர் லோக் சியூ ஃபூக் முன்னதாகக் கூறியிருந்தார்.
இவ்விஷயம் ரகசிய வாக்கெடுப்பு மூலம் தீர்மானிக்கப்படும் என்றும், தலைவர்கள் அரசாங்கத்தில் நீடிக்க வேண்டும் என்ற கட்சித் தலைமையின் நிலைப்பாட்டைப் பிரதிநிதிகள் நிராகரித்தாலும், அந்த முடிவை தான் மதிப்பேன் என்றும் அவர் கூறினார்.
