பேராக் மாநில அரசு மருத்துவ மனைகளில் ஏற்படும் நெரிசலுக்கு, முதிய நோயாளிகள் தங்கள் குடும்பத்தினருடன் வருவதும், நிர்ணயிக்கப்பட்ட நேரத்திற்கு முன்னதாகவே மருத்துவமனைக்கு வருவதுமே ஒரு முக்கிய காரணமாக இருப்பதாக மாநில சட்டமன்றத்தில் இன்று தெரிவிக்கப்பட்டது.
பேராக் மாநில சுகாதாரம், மனித வளம், இந்தியர் விவகாரம் மற்றும் தேசிய ஒருமைப்பாடு ஆகியவற்றுக்கான குழுவின் தலைவர் டத்தோ ஏ. சிவனேசன் இதனைத் தெரிவித்தார். முதிய நோயாளிகள் வழக்கமாகத் தங்கள் பிள்ளைகள் அல்லது பிற குடும்பத்தினருடன் வருவதாகவும், சிலர் முன்னதாகவே வந்தால் மருத்துவரை விரைவாகச் சந்திக்கலாம் என்ற நம்பிக்கையில் முன்கூட்டியே வருவதாகவும் அவர் கூறினார்.
“நாங்கள் அவர்களுக்கு மருத்துவச் சந்திப்புக்கான நேரத்தை (appointment) ஒதுக்கும்போது, அவர்கள் தனியாக வருவதில்லை. முதிய பெற்றோர்கள் அல்லது மூத்த குடிமக்கள் வரும்போது, அவர்கள் வழக்கமாகத் தங்கள் பிள்ளைகள் அல்லது தங்களுக்குத் துணையாக வருபவர்களுடன் வருகிறார்கள்.
“முன்கூட்டியே வந்தால் மருத்துவரை விரைவாகச் சந்திக்கலாம் என்று நினைப்பதாலும் அவர்கள் சீக்கிரம் வருகிறார்கள். இது மருத்துவமனை க்குள்ளும் வாகன நிறுத்துமிடத்திலும் நெரிசலை ஏற்படுத்துகிறது,” என்று அவர் கூறினார்.
அரசு மருத்துவமனைகளில் நோயாளிகள் நீண்ட நேரம் காத்திருக்க வேண்டிய நிலை மற்றும் மாநிலத்தின் வளர்ந்து வரும் மக்கள் தொகை மற்றும் நாள்பட்ட நோய்களின் அதிகரிப்புக்கு ஏற்ப மருத்துவமனை படுக்கை வசதிகள் போதுமானதாக உள்ளனவா என்பது குறித்து செலின்சிங் சட்டமன்ற உறுப்பினர் சலேஹுதீன் அப்துல்லா எழுப்பிய கூடுதல் கேள்விகளுக்கு சிவனேசன் பதிலளித்தார்
நோயாளிகளைப் பார்ப்பதற்கு முன்னதாக மருத்துவர்களுக்கு வார்டு ஆய்வுகள் (ward rounds) போன்ற பிற கடமைகளும் இருப்பதாகவும், நோயாளிகள் நிர்ணயிக்கப்பட்ட நேரத்திற்கு முன்னதாகவே வருவதால் காத்திருப்பு நேரம் அதிகரிக்கக்கூடும் என்றும் சிவனேசன் குறிப்பிட்டார்.
இருப்பினும், காத்திருக்க வேண்டியிருந்தாலும், மருத்துவர்கள் வழங்கும் சிகிச்சையில் நோயாளிகள் பொதுவாகத் திருப்தியுடனேயே இருப்பதாக அவர் கூறினார்
