ஜப்பானில் 100 வயது அல்லது அதற்கு மேற்பட்ட வயதுடையவர்களின் எண்ணிக்கை முதன்முறையாக 1,00,000-ஐக் கடந்துள்ளதாக அந்நாட்டின் சுகாதார அமைச்சு தெரிவித்துள்ளது.
தற்போது ஜப்பானில் 1,07,677 பேர் 100 வயதுக்கு மேற்பட்டவர்களாக உள்ளனர் (இதுவே உலகில் மிக அதிக எண்ணிக்கையாகும்); இவர்களில் 88% பேர் பெண்கள். கியோட்டோ நகரைச் சேர்ந்த 114 வயதுடைய கிஷிமோட்டோ ஃபுயோ (Kishimoto Fuyo) மிக மூத்த பெண்ணாகவும், குமாமோட்டோவைச் சேர்ந்த 112 வயதுடைய கட்டோ ஹிகாரு (Kato Hikaru) மிக மூத்த ஆணாகவும் உள்ளனர்.
மருத்துவம் மற்றும் தொழில்நுட்பத் துறைகளில் ஏற்பட்டுள்ள முன்னேற்றங்களைக் குறிப்பிட்டு, “இவ்வளவு அதிகமான மக்கள் நீண்ட, ஆரோக்கியமான மற்றும் சுறுசுறுப்பான வாழ்க்கையை வாழ்வது மகிழ்ச்சியளிக்கிறது” என்று சுகாதார அமைச்சர் கெனிச்சிரோ உவெனோ (Kenichiro Ueno) கூறினார்.
இருப்பினும், நிலையான சமூகப் பாதுகாப்பு அமைப்பைப் பராமரிப்பதில் நாடு எதிர்கொள்ளும் சவால்கள் குறித்தும் கெனிச்சிரோ எச்சரித்தார்.
ஆரோக்கியமான உணவுமுறை மற்றும் சுறுசுறுப்பான வாழ்க்கை முறை உள்ளிட்ட பல்வேறு காரணங்களே ஜப்பானியர்களின் நீண்ட ஆயுளுக்குக் காரணம் என்று நிபுணர்கள் கருதுகின்றனர்.
இந்தத் தீவு நாட்டின் உணவுமுறையில் மீன், காய்கறிகள் மற்றும் அரிசி ஆகியவை முக்கியப் பங்கு வகிக்கின்றன; மேலும் பல மேற்கத்திய உணவுமுறைகளை விட இதில் நிறைவுற்ற கொழுப்பு (saturated fat) குறைவாகவே உள்ளது.
