நிதித்துறையின் எதிர்காலம், தொழில்நுட்பத்தின் வேகம் அல்லது நுட்பத்தால் வரையறுக்கப்படாது; மாறாக, அது நம்பிக்கையை வலுப்படுத்துகிறதா, வாய்ப்புகளை விரிவுபடுத்துகிறதா மற்றும் சமூகத்திற்குச் சிறப்பாகச் சேவை செய்கிறதா என்பதைப் பொறுத்தே அமையும்.
பேங்க் நெகாரா மலேசியாவின் ஆளுநர் டத்தோ ஸ்ரீ அப்துல் ரஷீத் கஃபூர், “புத்தாக்கத்தை ஊக்குவிப்பது, நம்பிக்கையை நிலைநிறுத்துவது மற்றும் முன்னேற்றம் சமூகத்திற்குப் பயனளிப்பதை உறுதி செய்வது என்பதே எங்கள் அணுகுமுறை. இதுவே தெளிவானது” என்றார்.
“நாங்கள் புத்தாக்கத்தை முன்கூட்டியே கட்டுப்படுத்துவதும் இல்லை, அல்லது அது தடையின்றி வெளிப்பட அனுமதிப் பதும் இல்லை. எங்களின் நிலைப்பாடு விகிதாசாரம், சமத்துவம் மற்றும் தொழில் நுட்ப நடுநிலைமை ஆகியவற்றில் வேரூன்றியுள்ளது. இதன் மூலம் புத்தாக்கம் பொறுப்புடனும் நம்பிக்கையுடனும் முன்னேறுவதை நாங்கள் உறுதி செய்கிறோம்,” என்று அவர் கூறினார்.
இன்று இங்கு நடைபெற்ற ஆசிய பட்டய வங்கியாளர்கள் கழகத்தின் (AICB) நெக்ஸஸ் 2026 மாநாட்டின் தொடக்க உரையில் அவர் இவ்வாறு கூறினார்.
நடைமுறையில், இதன் பொருள், தொழில்துறையுடன் முன்கூட்டியே ஈடுபடுவது, தெளிவான ஒழுங்குமுறை எதிர்பார்ப்புகளை வழங்குவது, பொறுப்பான பரிசோதனைகளை ஆதரிப்பது மற்றும் பெரிய அளவில் புத்தாக்கத்தை செயல்படுத்தும் பகிரப்பட்ட உள்கட்டமைப்பில் முதலீடு செய்வது என்பதாகும் என்று அப்துல் ரஷீத் கூறினார்.
செயற்கை நுண்ணறிவுடன் (AI) சேர்ந்து, பிற முன்னேற்றங்களும் இத்துறையை வடிவமைக்கும். எங்களின் திறந்த நிதி கட்டமைப்பு, பாதுகாப்பான, ஒப்புதல் அடிப்படையிலான தரவுப் பகிர்வுக்கு ஓர் அடித்தளத்தை அமைக்கிறது. இதற்கான துணை உள்கட்டமைப்பு பேநெட் (PayNet) மற்றும் தொழில்துறையுடன் இணைந்து உருவாக்கப்பட்டு வருகிறது, மேலும் இதன் கட்டம் கட்டமான செயலாக்கம் 2027-ல் தொடங்குகிறது.
