லங்காவி, ஜலான் படாங் மாட்சிராட் பகுதியில் நேற்று நடைபெற்ற ‘ஆப்ஸ் லக்சரி’ (Ops Luxury) நடவடிக்கையின் போது, வங்காளதேச நாட்டைச் சேர்ந்த ஒருவர் பயன்படுத்திய மெர்சிடிஸ்- பென்ஸ் (Mercedes-Benz) வாகனத்தை கெடா மாநில சாலைப் போக்குவரத்துத் துறை (JPJ) பறிமுதல் செய்தது.
கெடா ஜேபிஜே இயக்குனர் ஸ்டீன் வான் லுட்டம் (Stien Van Lutam) இன்று வெளியிட்ட அறிக்கையில், காய்கறி விவசாயியாகப் பணிபுரியும் 38 வயதான அந்த நபர், மே 27, 2025 முதல் அந்த வாகனத்தைப் பயன்படுத்தி வந்ததாகத் தெரிவித்தார்.
“படாங் மாட்சிராட்டில் உள்ள சந்தை ஒன்றில் மூன்றாம் தரப்பினருக்கு விற்பனை செய்வதற்காகக் காய்கறிகளை ஏற்றிச் சென்றபோது அந்த நபர் தடுத்து நிறுத்தப்பட்டார். விசாரணையின்போது, அந்த வாகனம் தனக்குச் சொந்தமானது என்று அவர் கூறினார்; ஆனால், அதை வாங்குவதற்கு அவர் செலுத்திய உண்மையான விலையை அவர் தெரிவிக்கவில்லை.
“சோதனையில் அவரிடம் செல்லு படியாகும் ஓட்டுநர் உரிமம் இல்லை என்பதும், மோட்டார் வாகன உரிமம் (LKM) காலாவதியாகிவிட்டதும், ஜூலை 26-ஆம் தேதியுடன் வாகனத்திற்கான காப்புறுதி முடிந்துவிட்டதும் தெரியவந்தது,” என்று கூறிய அவர், அதனைத் தொடர்ந்து அந்த வாகனம் பறிமுதல் செய்யப்பட்டதாகவும் தெரிவித்தார்.
