முகநூல் வாயிலாக ஒருவருக்குக் குற்றவியல் ரீதியான மிரட்டல் விடுத்ததாகக் கூறப்படும் விவகாரம் தொடர்பான விசாரணைக்கு உதவும் வகையில், 34 வயதான சமூக ஆர்வலர் ஒருவர் இரண்டு நாட்கள் காவலில் வைக்கப்பட்டுள்ளார்.
பெர்னாமா நிறுவனத்தின் தகவலின்படி, தண்டனைச் சட்டம் மற்றும் 1998-ஆம் ஆண்டின் தகவல் தொடர்பு மற்றும் பல்லூடகச் சட்டத்தின் கீழ், குற்றவியல் மிரட்டல் மற்றும் இணையவழித் தொடர்புகளைத் தவறாகப் பயன் படுத்தியது தொடர்பான விசாரணை களை மேற்கொள்ள சிரம்பான் மாஜிஸ்திரேட் நைலா நிக்ருல் தர்மிசி (Naeilah Nikrul Tarmizi) இந்தக் காவல் உத்தரவைப் பிறப்பித்தார்.
அந்தச் சமூக ஆர்வலரின் பெயர் அதிகாரப்பூர்வமாக வெளியிடப்பட வில்லை என்றாலும், நான்கு மாதங்களுக்கும் மேலாக வெளிநாட்டில் இருந்த பிறகு, போர்ட் டிக்சன் மாவட்டக் காவல் தலைமையகத்தில் தமீம் தஹ்ரி அப்துல் ரசாக் (Tamim Dahri Abdul Razak) சரணடைந்ததாக நேற்று செய்தி வெளியானது.
சந்தேக நபரால் முகநூலில் மிரட்டப்பட்டதாகக் கூறி ஒருவர் மார்ச் 10-ஆம் தேதி அளித்த புகாரின் அடிப்படையில், குற்றவியல் மிரட்டல் மற்றும் இணையத்தில் அவதூறான உள்ளடக்கத்தை வெளியிட்டது தொடர்பாகக் காவல்துறையினர் தமீம் மீது விசாரணை நடத்தி வருகின்றனர்.
மலேசியாவுக்குத் திரும்புவதற்கு முன் அந்தச் சமூக ஆர்வலர் தாய்லாந்தில் இருந்ததாகவும், பின்னர் கிளாந்தான் எல்லையில் உள்ள அங்கீகரிக்கப்படாத வழித்தடம் வழியாக நாட்டிற்குள் நுழைந்து காவல்துறையிடம் சரணடைந்ததாகவும் நம்பப்படுகிறது.
சட்டவிரோதமானவை” என்று தான் குறிப்பிட்ட இந்து ஆலயங்களுக்கு எதிராகப் பிரச்சாரம் செய்த தமீம் மீது, ஒரு மதத்தை அவமதிக்கும் நோக்கத்துடன் வழிபாட்டுத் தலத்தையோ அல்லது புனிதமாகக் கருதப்படும் பொருளையோ அவமதித்ததாகக் குற்றம் சாட்டப்பட்டு, மார்ச் 17 அன்று லங்காவி மாஜிஸ்திரேட் நீதிமன்றத்தில் வழக்குத் தொடரத் திட்டமிடப்பட்டிருந்தது.
இருப்பினும், அவர் பாங்காக்கிலிருந்து ரியாத் வழியாக சவுதி அரேபியாவிற்குச் சென்றிருந்ததால், அவரை நீதிமன்றத் தில் ஆஜர்படுத்துவதற்குத் கூடுதல் அவகாசம் தேவை என்று அரசுத் தரப்பு கோரியது.
இந்துக்களின் புனிதப் பொருளான ‘திரிசூலத்தை’ அவமதிப்பதாகக் காட்டப்பட்ட காணொளி ஒன்றைத் தொடர்ந்து, தமீம் மீது மொத்தம் 192 காவல் நிலையப் புகார்கள் அளிக்கப்பட்டன
