புதன்கிழமை நடைபெற்ற யுஎஸ் ஓபன் ஸ்குவாஷ் தொடரின் காலிறுதிச் சுற்றில், எகிப்தைச் சேர்ந்த உலக சாம்பியன் அமினா ஓர்ஃபியிடம் தோல்வி யடைந்ததன் மூலம், எஸ். சிவசங்கரிக்கு இந்த தீபாவளி மறக்க விரும்பும் ஒரு நிகழ்வாக மாறியுள்ளது.
உலக தரவரிசையில் 4-வது இடத்தில் உள்ள சிவ்சங்கரி, ஓர்ஃபியை வீழ்த்தி வெற்றி பெற வேண்டும் என்று எதிர்பார்த்திருந்தார். ஆனால், பிலடெல்பியாவில் நடைபெற்ற இந்த ஆட்டத்தில், 43 நிமிடங்களில் 11-8, 11-1, 11-8 என்ற நேர் செட்களில் ஓர்ஃபி வெற்றி பெற்று, சிவசங்கரியை முறியடித்தார்.
இருவரும் இதுவரை 12 முறை நேருக்கு நேர் மோதியுள்ள நிலையில், அதில் 9-வது முறையாக சிவசங்கரி தோல்வியைச் சந்தித்துள்ளார்.
இந்த ஆண்டு லண்டன் கிளாசிக், கத்தார் கிளாசிக் மற்றும் எகிப்திய ஓபன் ஆகிய பட்டங்களை வென்றுள்ள, உலக தரவரிசையில் முதலிடத்தில் இருக்கும் ஓர்ஃபி, நாளை நடைபெறவுள்ள அரையிறுதிப் போட்டியில் தனது நாட்டு வீராங்கனை நூர் எல் ஷெர்பினியை அல்லது அமெரிக்காவின் அமண்டா சோபியை எதிர்கொள்வார்.
மலேசிய ஸ்குவாஷ் ராக்கெட் சங்கத்தின் பயிற்சி இயக்குநர் ஆண்ட்ரூ கிராஸ் கூறுகையில், சிவசங்கரி தனது முழுத் திறமையையும் வெளிப்படுத்தினார் என்றும், ஆனால் ஓர்ஃபி அவரை விடச் சிறப்பாக விளையாடினார் என்றும் தெரிவித்தார்.
